Fréttir | Skógræktin

Nýtt upphaf skógræktar

Fri, 29 Dec 2023 10:06:00 +0000

Um leið og líður að lokum Skógræktarinnar marka áramótin 2023-2024 nýtt upphaf skógræktar á Íslandi. Fyrsta janúar verður til ný stofnun, Land og skógur, og þar með verða á ný sameinuð þau verkefni sem heyrðu undir embætti skógræktarstjóra á árunum 1908-1914.

Gott skíðafæri í Haukadalsskógi

Fri, 29 Dec 2023 08:51:00 +0000

Skíðagöngubrautir hafa verið troðnar í Haukadalsskógi frá því fyrir jól og hefur skíðagöngufólk tekið þeim fagnandi. Útlit er fyrir gott færi næstu daga og nægur snjór er í skóginum.

Glaðlegur Jólaköttur

Thu, 28 Dec 2023 15:42:00 +0000

Talið er að rúmlega þrjú þúsund manns hafi sótt jólamarkaðinn Jólaköttinn á Héraði nú á aðventunni. Meðal annars komu gestir bæði frá Akureyri og Hornafirði en til sölu voru margvíslegar vörur frá um fimmtíu aðilum.

Eru jólatré dýr á Íslandi?

Mon, 18 Dec 2023 09:20:00 +0000

Íslensk stafafura er á svipuðu verði hér á landi og þinsjólatré beint frá býli á Bretlandi og í sveitahéruðum í austanverðum Bandaríkjunum. Innfluttur nordmannsþinur frá Danmörku virðist álíka dýr hér á landi og í Danmörku og ódýrari en glæsiþinur og degli í Bandaríkjunum. Hvernig getur þetta gerst í landi þar sem meginhluti trjánna er innfluttur, flutningskostnaður verulegur, markaðurinn lítill og fákeppni í sölunni? Þorbergur Hjalti Jónsson, sérfræðingur í skógarhagfræði hjá Skógræktinni, kannaði jólatrjáamarkaðinn hér og í nágrannalöndunum austan hafs og vestan.

Fagráðstefna skógræktar 2024

Wed, 13 Dec 2023 09:35:00 +0000

Skógarauðlindin - innviðir og skipulag verður þema Fagráðstefnu skógræktar sem fram fer í Hofi á Akureyri dagana 20.-21. mars 2024. Auglýst verður eftir fyrirlestrum og veggspjöldum í byrjun árs.

Góð ráð um meðferð jólatrjáa

Wed, 06 Dec 2023 12:25:00 +0000

Eins og margt fólk veit er minnihluti þeirra jólatrjáa sem seld eru hér á landi fyrir jólin íslensk tré. Flest trjánna eru flutt til landsins frá útlöndum og vaxandi hluti þeirra hefur undanfarin ár verið gervitré komin alla leið frá Asíu. Ástæða innflutningsins er meðal annars sú að ekki eru ræktuð nægilega mörg tré á landinu. En hvernig á að meðhöndla lifandi jólatréð þegar heim í stofu er komið?

200 dagar til stefnu!

Wed, 06 Dec 2023 05:00:00 +0000

Forskráning er nú í gangi á stærsta viðburð innan skógvísinda í heiminum á næsta ári. Í dag eru 200 dagar þar til ráðstefnan hefst.

Íslendingur dúx frá Ási

Tue, 05 Dec 2023 12:12:00 +0000

Álfsól Lind Benjamínsdóttir skógfræðingur hlaut nýverið hæstu einkunn á meistaraprófi í skógfræði frá NMBU, norska landbúnaðarháskólanum að Ási. Fyrir afrekið hlaut hún veglegan styrk frá samtökum norskra skógareigenda.

Síðasti starfsmannafundur Skógræktarinnar

Tue, 05 Dec 2023 11:12:00 +0000

Nær allir starfsmenn Skógræktarinnar komu saman á starfsmannafundi sem fram fór á Hótel Hallormsstað 30. nóvember. Einungis fjórir starfsmenn af um sextíu áttu þess ekki kost að sitja fundinn. Þetta var síðasti starfsmannafundur stofnunarinnar undir þessu nafni en um áramót rennur hún ásamt Landgræðslunni inn í nýja stofnun, Land og skóg.

Grunnfróðleikur um skógrækt í myndbandi Skógarnytja

Mon, 27 Nov 2023 15:39:00 +0000

Tugir trésmíðanema hafa komið í vettvangsnám hjá Skógræktarfélagi Reykjavíkur í Heiðmörk undir merkjum verkefnisins Skógarnytja. Þetta samstarfsverkefni félagsins og Tækniskólans hefur nú sent frá sér myndband með ýmsum grunnfróðleik um skóga og skógrækt.

Land og skógur í mótun

Wed, 22 Nov 2023 20:58:00 +0000

Starfsfólk Skógræktarinnar og Landgræðslunnar hittist á tveggja daga sameiginlegum starfsmannafundi sem fram fór á Selfossi. Á fyrri deginum var meðal annars kynnt hugmynd að merki fyrir hina nýju stofnun. Á fundinum tók starfsfólkið virkan þátt í mótun stofnunarinnar. Forstöðumaður Lands og skógar segir að fundurinn gefi góðan byrir fyrir áframhaldandi undirbúning hinnar nýju stofnunar.

Nóvembergróðursetning

Wed, 22 Nov 2023 20:01:00 +0000

Ekkert er því til fyrirstöðu að gróðursetja tré í nóvember ef tíðarfar hefur verið gott eins og þetta haustið. Starfsfólk Selfossskrifstofu Skógræktarinnar setti niður aspir og furur í landi Kollabæjar í Fljótshlíð í síðustu viku undir stjórn Hrafns Óskarssonar, ræktunarstjóra á Tumastöðum. Búist er við um tuttugu tonna árlegri meðalbindingu koltvísýrings á svæðinu.

Komið að tína birkifræ í Vesturbyggð!

Fri, 17 Nov 2023 09:20:00 +0000

Landsátakið Söfnum og sáum birkifræi efnir til birkifrætínslu og -sáningar í Vesturbyggð laugardaginn 18. nóvember og er fólk á öllum aldri hvatt til að vera með. Fræðsla verður í boði á Bíldudal kl. 11, á Tálknafirði kl. 13 og loks kl. 15 á Patreksfirði. Vesturbyggð er nánast eina svæðið á landinu þar sem eitthvað þroskaðist af birkifræi þetta árið.

Íslenskt timbur til lagfæringa á Þingvöllum

Tue, 14 Nov 2023 13:46:00 +0000

Unnið er að endurbótum á efsta hluta göngustígsins frá útsýnispallinum á Hakinu á Þingvöllum og niður í Almannagjá. Viðargólf göngubrúarinnar verður endurnýjað með sitkagreni úr Haukadal sem unnið var í sögunarmyllu Skógræktarinnar í Þjórsárdal.

Sitkabastarður

Tue, 14 Nov 2023 09:47:00 +0000

Heitið sitkabastarður þykir ekki öllum hljóma vel enda hefur orðið bastarður fengið heldur neikvæða merkingu í málinu. Stundum hefur þessi blendingur sitkagrenis og hvítgrenis verið kallaður hvítsitkagreni en það hefur ekki fest í máli fólks. Við tökum því jákvæða pólinn í hæðina og einblínum á merkinguna blendingur eða kynblendingur sem er auðvitað sú upphaflega.

Fundað með framleiðendum

Mon, 13 Nov 2023 15:40:00 +0000

Fulltrúar skógarplöntuframleiðenda hittust í liðinni viku á fundi með sérfræðingum frá Skógræktinni og sviðstjóra skógarþjónustu. Mikil ánægja var með fundinn og áhugi er á því að slíkt samtal fari reglulega fram, til dæmis einu sinni á ári.

Áhrif jarðvinnslu til nýskógræktar á kolefnisbindingu

Mon, 13 Nov 2023 10:35:00 +0000

Í heildina er tap kolefnis úr forða jarðvegs yfirleitt mjög lítið við undirbúning lands til skógræktar, sérstaklega í samanburði við þá miklu kolefnisbindingu sem á sér stað í uppvaxandi skógi. Hérlendar iðufylgnirannsóknir gefa vísbendingar um að áhrif losunar vegna jarðvinnslu séu lítil og skammvinn. Um þetta skrifar Úlfur Óskarsson, verkefnastjóri kolefnismála hjá Skógræktinni, í grein sem birtist á vef Heimildarinnar um helgina.

Skráning á heiðurslista bókar með servíettulimrum Þorsteins Valdimarssonar

Thu, 09 Nov 2023 14:31:00 +0000

Ættingjar Þorsteins Valdimarssonar skálds vinna að útgáfu bókverks sem sýnir servíettur þær sem skáldið ritaði á limrur. Allar þessar limruservíettur komu fyrst fyrir almenningssjónir á sýningu sem Bókasafn Kópavogs hélt um ævi Þorsteins og störf haustið 2018 í tilefni af aldarminningu skáldsins.

Fróðleikur um broddfurur í þjóðskóginum Grundarreit

Wed, 08 Nov 2023 15:39:00 +0000

Í nýjum pistli á vef Skógræktarfélags Eyfirðinga ræðir Sigurður Arnarson um broddfurur í þjóðskóginum Grundarreit í Eyjafirði. Hann tæpir á sögu reitsins og segir líka sögu nokkurra broddfurutrjáa í reitnum sem hafa náð að geta af sér efnilegar sjálfsánar plöntur. Mögulega sé þar í gangi áhugavert náttúruval.

Búum fjölgar í Loftslagsvænum landbúnaði og garðyrkjan bætist við

Fri, 03 Nov 2023 09:40:00 +0000

Garðyrkjubændur eru nú komnir í hóp þeirra bænda sem vinna að ýmsum betrumbótum í búrekstri sínum undir verkefninu Loftslagsvænn landbúnaður. Bændur á fjórtán nýjum búum tóku nýverið fyrstu skref sín í verkefninu og segjast sjá í því mikil tækifæri. Meðal annars geti bæði sparast vinna og peningar með umbótum í þágu loftslagsins.